काठमाडौं । भारतीय महिला क्रिकेट टोलीले ऐतिहासिक उपलब्धि हासिल गर्दै पहिलोपटक एकदिवसीय विश्वकप क्रिकेटको उपाधि जितेको छ । मुम्बईमा आइतबार सम्पन्न रोमाञ्चक फाइनल खेलमा भारतले दक्षिण अफ्रिकालाई ५२ रनले पराजित गर्दै नयाँ अध्याय कोरेको हो ।
टस हारेर पहिले ब्याटिङको निम्तो पाएको भारतले निर्धारित ५० ओभरमा ७ विकेट गुमाउँदै २९८ रनको बलियो योगफल तयार गर्यो । शानदार फर्ममा रहेकी ओपनर शफाली वर्माले आक्रमक ८७ रन प्रहार गर्दै पारीको मेरुदण्ड बनाइन् । दीप्ति शर्माले ५८ रनको मूल्यवान् योगदान दिँदै ब्याटिङ र बलिङ दुवैमा चमक देखाइन् भने स्मृति मन्धानाले सन्तुलित ४५ रन जोडिन् ।
२९९ रनको लक्ष्य पछ्याउन मैदानमा उत्रिएको दक्षिण अफ्रिकी टोली ४५.३ ओभरमै २४५ रनमा समेटियो । कप्तान लाउरा वुल्भार्डले उत्कृष्ट १०१ रनको शतक पूरा गरे पनि टोलीलाई जितको नजिक पुर्याउन सकिनन् । एनरी डर्कसनले ३५ रन जोडेकी थिइन् ।
बलिङतर्फ भारतकी दीप्ति शर्मा नै खेलकी नायक बनिन् — उनले १० ओभरमा ५ विकेट झारेर दक्षिण अफ्रिकी ब्याटिङ लाइनअप ध्वस्त पारिन् । शफाली वर्मा र श्री चरनीले पनि २ र १ विकेट लिएर सहयोग पुर्याए । दक्षिण अफ्रिकाका लागि आयाबोङ्गा खाकाले ३ विकेट लिएकी थिइन् भने मलाबा, डे क्लर्क र टायरनले १–१ विकेट लिएका थिए ।
यसअघि भारत सन् २००५ र २०१७ मा फाइनल पुगे पनि उपाधि जित्नबाट चुकेको थियो । तर यसपटक सेमिफाइनलमा बलियो अस्ट्रेलियालाई हराउँदै फाइनलमा प्रवेश गरेकी भारतले अन्ततः दशकौँको प्रतीक्षा टुटाउँदै विश्वकपको पहिलो ट्रफी हात पारेकी हो ।
महिला क्रिकेट विश्वकपको इतिहासमा अस्ट्रेलियाले सबैभन्दा धेरै — ७ पटक — उपाधि जितेको छ । तर यो जितसँगै भारतले पनि विश्व क्रिकेटमा नयाँ प्रभुत्वको संकेत दिएको छ ।
दीप्ति शर्मालाई ‘प्लेयर अफ द फाइनल’ घोषित गरिएको छ, जबकि शफाली वर्माले आफ्नो आक्रामक ब्याटिङका लागि ‘प्लेयर अफ द टुर्नामेन्ट’ उपाधि हात पारिन् ।
