काठमाडौं । एनपीएलको दोस्रो संस्करणमा शनिबार त्रिवि मैदान ‘कीर्तिमानको कारखाना’ बनेको छ । दोस्रो दिनको दोस्रो खेलमा विराटनगर किङ्सले पोखरा एभेन्जर्सविरुद्ध रनको यस्तो वर्षा गर्यो, जसले एनपीएलका सबै पुराना रेकर्ड बगायो ।
पहिलो इनिङमा विराटनगरले प्रहार गरेको २२० रन प्रतियोगिताको इतिहासमै अहिलेसम्मकै सर्वोच्च टिम स्कोर ठहरियो । यसअघि कुनै पनि टिमले २०० रन पार गर्न नसकेको रेकर्ड आज भत्कियो । रोशनीमय फ्लडलाइटको उज्यालोमा विराटनगरले नयाँ माइलस्टोन कायम गर्यो ।
अघिल्लो उच्च स्कोर पनि विराटनगरकै नाममा थियो—पहिलो संस्करणमा बनाइएको १९३ रन। रोचक कुरा के भने, त्यो खेलमा पनि ओपनर लोकेश बम नै ‘रन–इञ्जिन’ बनेका थिए । आज लोकेशले ४८ बलमा ७ छक्का र १ चौका प्रहार गर्दै ७२ रन बनाए । उनी एकै इनिङमा ७ छक्का प्रहार गर्ने एनपीएल इतिहासका तेस्रो ब्याटर बने—उनीभन्दा अघि कुशल मल्ल र विवेक यादवले यस्तो प्रदर्शन गरेका थिए ।
दोस्रो विकेटका लागि लोकेश बम र मार्टिन गप्टिलबीचको १३२ रनको विस्फोटक साझेदारी पनि आजकै अर्को कीर्तिमान हो । ७५ बलमा बनेको यो साझेदारी एनपीएलमा दोस्रो विकेटका लागि अहिलेसम्मकै ठूलो हो, र समग्र हिसाबले दोस्रो सर्वाधिक साझेदारी पनि हो । पहिलो संस्करणमा पोखराका दिनेश खरेल र एन्ड्र्यू गोउसले १७६ रनको साझेदारी गर्दै शीर्ष स्थान सुरक्षित राखेका छन् ।
विराटनगरका ब्याटरले आज उडाएका १७ छक्का पनि प्रतियोगिताको नयाँ रेकर्ड हो । लोकेशका ७ छक्कासँगै गप्टिलले ५, शुभम रन्जनेले २ तथा मुन्से, बसिर र नारायण जोशीले एक–एक छक्का जोडे ।
तर पावरप्लेमा भने पोखराले ऐतिहासिक प्रहार गर्यो—६ ओभरमै ७७ रन जोड्दै उनीहरूले नयाँ रेकर्ड स्थापना गरे । कुशल भुर्तेल र एडम रोसिङटनको ‘काउन्टर–अट्याक’ ले विराटनगरलाई दबाबमा पारे पनि पावरप्लेपछि खेलको रंग बद्लियो ।
आठौँ ओभरमा कप्तान सन्दीप लामिछाने मैदानमा उत्रिएपछि खेलको दिशानै फेरियो । उनले जेम्स निसमलाई डकमा समाते, त्यही ओभरमा त्रितराज दासलाई बोल्ड गर्दै पोखराको आत्मविश्वास भत्काए । त्यसपछि पोखराको ब्याटिङ–लाइनअप छिन्नभिन्न हुँदै गयो ।
बलिङतर्फ पोखराका लागि आजको दिन बिर्सनलायक बन्यो । तीन बलरले ४० भन्दा बढी रन खर्चिएको यो पहिलोपटक हो । आकाश चन्दले १ विकेटसहित ४८ रन, म्याट टेलरले २ विकेटसहित ४८ रन, र सागर ढकालले ४० रन खर्चे ।
विराटनगरको ऐतिहासिक रन–झरना र पोखराको आक्रामक पावरप्ले प्रदर्शनसहित आजको म्याच एनपीएल इतिहासकै सबैभन्दा रोचक र कीर्तिमानी खेल बनेर स्मरणीय रह्यो ।
