मधेश प्रदेशका सभामुख मण्डलविरुद्ध पदअनुकूल आचरण विवाद : आज १ बजे प्रदेशसभा छलफल

जनकपुरधाम । मधेश प्रदेशका सभामुख रामचन्द्र मण्डलले पदअनुकूल आचरण नगरेको आरोपमा दर्ता भएको प्रस्तावमाथि छलफल गर्न आज दिउँसो १ बजे प्रदेशसभा बैठक बोलाइएको छ । प्रदेशसभा सचिवालयले सामाजिक सञ्जाल ग्रुपमार्फत सांसदहरूलाई सहभागी हुन सूचना पठाएको छ ।

गत कात्तिक २७ गते सात दलीय गठबन्धनका ६४ जना प्रदेश सांसदले सभामुख मण्डलविरुद्ध प्रस्ताव दर्ता गराएका थिए । कानुनअनुसार यस्तो प्रस्तावमाथि एक साताभित्र सदनमा छलफल गर्नुपर्ने प्रावधान रहेकाले आजको बैठक विशेष महत्त्वपूर्ण हुने देखिन्छ ।

उपसभामुख बबिता राउत ईशरको निर्देशनमा बैठक आह्वान गरिएको हो । यसअघि सात दलीय गठबन्धनका ३२ जना सांसदले उपसभामुखलाई बैठक बोलाउन औपचारिक रूपमा ज्ञापनपत्र बुझाएका थिए ।