काठमाडौँ । राष्ट्रिय स्वतन्त्र पार्टी (रास्वपा)को केन्द्रीय समिति बैठक आज दिउँसो २ बजे पार्टी केन्द्रीय कार्यालय वनस्थलीमा बस्न लागेको छ। बैठकमा समसामयिक राजनीतिक परिस्थिति, संवाद तथा सहकार्यका पहलहरू, र पार्टीका तर्फबाट भइरहेका नियमित राजनीतिक अध्ययन–विश्लेषणबारे विस्तृत छलफल हुने भएको छ।
सभापति रवि लामिछानेसम्बन्धी मुद्दाको अद्यावधिक कानुनी अवस्थाबारे बैठकलाई विस्तृत जानकारी दिइने पार्टी स्रोतले जनाएको छ।
त्यस्तै, केन्द्रीय समितिको विस्तारित बैठकको समीक्षा, प्रस्तुत प्रतिवेदन परिमार्जनसहित पारित गर्ने तथा वाचापत्र कार्यदल विस्तार, संविधान परिमार्जन कार्यदल संयोजक मनोनयन गरी तत्काल कार्य प्रारम्भ गर्ने निर्देशन दिने कार्यसूची बैठकमा रहेको छ।
राजनीतिक दल तथा समूहहरूको गतिविधि नियमित अध्ययन–विश्लेषण गरी आवश्यकताअनुसार केन्द्रीय तहमा ब्रिफिङ गर्ने संयन्त्रलाई सक्रिय बनाउने विषयसमेत आजको बैठकको एजेन्डामा समावेश गरिएको छ।
