काठमाडौं । प्रधानमन्त्री सुशीला कार्कीले आगामी फागुन २१ गते हुने प्रतिनिधि सभा निर्वाचनको तयारीलाई तीव्र बनाउन आज दलका शीर्ष नेताहरूसँग संयुक्त छलफल गर्न लागेकी छन् । अपराह्न ४ बजे प्रधानमन्त्री कार्यालय सिंहदरबारमा हुने बैठकका लागि निर्वाचन आयोगमा दर्ता भएका सबै दलका नेताहरुलाई निम्ता गरिएको उनको सचिवालयले जनाएको छ ।
चुनावमा सहभागिताका लागि अपिल र आवश्यक समन्वयबारे केन्द्रित रहने आजको छलफल दल दर्ता प्रक्रिया तीव्र भइरहेका बेला महत्वपूर्ण मानिएको छ । प्रधानमन्त्री कार्कीले यसअघि विघटित प्रतिनिधि सभामा प्रतिनिधित्व गर्ने दलहरूसँग छुट्टै भेटघाट गरिसकेकी छन् । उनले नयाँ पुस्तालाई प्रतिनिधित्व गर्ने जेनजीका प्रतिनिधिहरूसँग पनि विशेष संवाद गरेकी थिइन् ।
सरकार आगामी निर्वाचनलाई निष्पक्ष, शान्तिपूर्ण र विश्वासिलो बनाउन सबै राजनीतिक पक्षहरूसँग व्यापक सहकार्यमा जाने तयारीमा रहेको स्रोतले जनाएको छ ।
