काठमाडौं । नेकपा (बहुमत) निकट अखिल (क्रान्तिकारी) का महासचिव उशाकिरण आजादले नेपालमा ‘राष्ट्रिय स्वाधीनता गम्भीर जोखिममा परेको’ दाबी गर्दै स्वाधीनताको रक्षाका लागि युद्ध अपरिहार्य हुन सक्ने चेतावनी दिएका छन् । सामाजिक सञ्जाल फेसबुकमार्फत सार्वजनिक धारणा राख्दै उनले सर्वपक्षीय सम्मेलनमार्फत अन्तरिम स्वाधीन सरकार गठन नभए नेपाली जनता युद्ध घोषणा गर्न बाध्य हुने दाबी गरेका हुन् ।
आजादका अनुसार सुशासन, भ्रष्टाचार नियन्त्रण र राष्ट्रिय हितका सवालमा उठिरहेका शक्तिलाई कमजोर बनाउँदै एनजीओ–आइएनजीओले सञ्चालन गर्दै आएको सत्ता संरचना जनहितविपरीत क्रियाशील छ । उनकाे भनाइमा, अहिलेको राजनीतिक व्यवस्था राष्ट्रहित अनुरूप कार्य गर्न असमर्थ देखिएकोले “व्यवस्थाको जरोमै रूपान्तरण” आवश्यक भइसकेको छ ।
आजादले लेखेका छन्, “स्वाधीनताको रक्षाका लागि स्वाधीन युद्ध जनताको अपरिहार्य आवश्यकता भइसकेको छ । सर्वपक्षीय सम्मेलन गरेर अन्तरिम स्वाधीन सरकार गठन गरिएन भने ढिलो–चाँडो नेपाली जनताले युद्ध घोषणा गर्नेछन् ।”
साथै उनले सुशीला कार्की नेतृत्वको अन्तरिम सरकारलाई “खारेज गर्नुपर्ने” उल्लेख गर्दै, “सुशीला सरकारलाई खारेज गरौँ, अन्तरिम स्वाधीन सरकार गठन गरौँ, जनयुद्ध जिन्दाबाद,” भन्ने अभिव्यक्ति समेत दिएका छन् ।
