काठमाडौं । जनमुक्ति सेना नेपालले २०८२ मंसिर ८ गते विशेष राष्ट्रिय कार्यक्रम आयोजना गर्ने भएको छ । जनमुक्ति सेनाको औपचारिक स्थापना दिवसको अवसर पारेर हुँदै आएको यो कार्यक्रम मुलुकभरका पूर्व जनमुक्ति सेनाका सदस्य, जनसमर्थक तथा सहानुभूति राख्ने सबैका लागि खुला रहने संगठनले जनाएको छ ।
संगठनका अनुसार “विशेष छलफल, बहस, अन्तरसंवाद तथा साझा चिन्तन” नाम दिइएको यस विशेष भेलालाई ऐतिहासिक महत्वका साथ मनाइनेछ । कार्यक्रम दाङको तुलसीपुर स्थित संग्राम ब्यारेकमा सञ्चालन हुनेछ । सहभागी समन्वयका लागि सम्बन्धित जिल्ला तथा क्षेत्रका जिम्मेवार व्यक्तिहरूलाई सम्पर्क गर्न आग्रह गरिएको छ ।
जनमुक्ति सेना नेपालले नयाँ राजनीतिक परिस्थितिमा संगठनको भूमिका, रणनीतिक दिशा, सामूहिक अनुभव र भविष्यका चुनौतीहरूबारे साझा मूल्यांकन गर्दै एकीकृत रणनीति निर्माण गर्ने उद्देश्य कार्यक्रमको केन्द्रमा रहेको जनाएको छ ।
संगठनले कार्यक्रमलाई “क्रान्तिकारी आन्दोलनको एकता, विश्वास र सहमतिका नयाँ आधार निर्माण गर्ने महत्वपूर्ण अवसर” का रूपमा व्याख्या गरेको छ ।
