दाङ । धर्मेन्द्र बास्तोला नेतृत्वको नेकपा (बहुमत) दाङ तथा क्रान्तिकारी कम्युनिस्ट पार्टी नेपाल दाङले २०६३ साल मंसिर ५ गते गरिएको बिस्तृत शान्ति सम्झौतालाई “जनता र क्रान्तिका बलिदानमाथिको ठूલો धोका” भन्दै घोराहीमा संयुक्त कोणसभा सम्पन्न गरेका छन् ।
कार्यक्रममा नेकपा (बहुमत) का तर्फबाट केन्द्रीय सदस्य सजक र क्रान्तिकारी कम्युनिस्ट पार्टी नेपालका तर्फबाट केन्द्रीय सदस्य नविनले मुख्य सम्बोधन गरेका थिए । साथै नेकपा (बहुमत) का ५ नम्बर ब्युरो इन्चार्ज जीत, क्रान्तिकारी कम्युनिस्ट पार्टी नेपालका ४ नम्बर ब्युरो इन्चार्ज समीर तथा केन्द्रीय सदस्य बादलसहित दुवै पक्षका नेता–कार्यकर्ताहरूको उपस्थिति थियो ।
सभामा बोल्दै केन्द्रीय सदस्य सजकले २०६३ सालको शान्ति सम्झौतालाई “जनताको बलिदान र क्रान्तिकारी लक्ष्यहरूमाथि प्रहार” भन्दै कडा आलोचना गरे । उनले संसदीय दलहरूलाई “देश लुट्ने दलाल” को संज्ञा दिदै प्रचण्ड, ओली र देउवालाई “सामन्ती–पुँजीवादी र विदेशी स्वार्थका एजेन्ट” को रूपमा व्याख्या गरे । दाङमा संसदीय दलका केही नेताहरूको संरक्षणमा मिटरब्याजीहरू फेरि सक्रिय हुन थालेको दाबी गर्दै उनले “मिटरब्याज पीडितलाई नथिच्न” चेतावनी पनि दिए ।
त्यसैगरी, क्रान्तिकारी कम्युनिस्ट पार्टी नेपालका केन्द्रीय सदस्य नविनले प्रचण्ड नेतृत्वले जनयुद्धका सहिदहरूको बलिदानसँग सम्झौता गर्दै संसदीय शक्तिसँग हात मिलाएको आरोप लगाए । उनले “सच्चा क्रान्तिकारीहरू एकजुट भएर नयाँ क्रान्तिकारी मार्ग खोल्नुपर्ने” आवश्यकता औँल्याए । नविनले जेनेरेसन–जेड (Gen-Z) बीचमा बढ्दै गएको विद्रोही चेतनाका पछाडि संसदीय दलका मुख्य नेताहरूकै असफल भूमिकाको परिणाम रहेको बताए ।
कार्यक्रममा दुवै पक्षले बिस्तृत शान्ति सम्झौता “धोका” भएको साझा निष्कर्ष निकाल्दै संसदीय दलाल व्यवस्थाकाे तीव्र आलोचना गरेका थिए । कोणसभाले नयाँ क्रान्तिकारी मार्ग अवलम्बन नगरिकन जनताका अधुरा सपना सिद्ध नहुने भन्दै नयाँ क्रान्तिकारी मार्ग अवलम्बनका लागि सहमति व्यक्त गरेको छ ।
