काठमाडौं । नेकपा (बहुमत) ले जनसंविधान निर्माणलाई राष्ट्रिय निकासका रूपमा अघि सार्दै ‘जनसंघर्ष अभियान’ घोषणा गरेको छ । शुक्रबार राजधानीको संवाद डबलीमा आयोजित पत्रकार सम्मेलनमा महासचिव धर्मेन्द्र बास्तोला ‘कञ्चन’ ले सुशीला कार्की नेतृत्वको सरकार जनआन्दोलन–जेनजी बिद्रोहले उठाएका एजेण्डाबाट विचलित भएको दाबी गर्दै तत्काल सरकार विघटन गरी अन्तरिम स्वाधीन संयुक्त सरकार गठन गर्नुपर्ने माग राखे ।
बास्तोलाले जेनजी बिद्रोहका सुशासन र भ्रष्टाचारविरुद्धका सकारात्मक एजेण्डाहरूसँग आफ्नो पार्टीको पूर्ण सहमति रहेको उल्लेख गर्दै वर्तमान सरकार त्यसको कार्यान्वयनबाट टाढा गएको ठाेकुवा गरे । “हामी सुरुदेखि नै भ्रष्टाचारविरुद्ध संघर्षरत थियाैं । तर अहिलेको संरचनामा ती एजेण्डा पूरा हुने सम्भावना देखिँदैन । अब स्वाधीन संयुक्त सरकार अपरिहार्य बनेको छ,” उनले भने ।
उनले २०६३ मंसिर ५ गते भएको वृहत्त शान्ति सम्झौताले महान जनयुद्धका उद्देश्यहरू ‘विसर्जन’ गरेको भन्दै अहिलेको जेनजी आन्दोलनको मर्मसमेत त्यस्तै गरी कमजोर बनाइने खतरा देखिएको टिप्पणी गरे । बास्तोलाका अनुसार देशको स्थायी समाधान जनसंविधानमार्फत मात्र सम्भव छ । उनले कृषि, उद्योग तथा आवासका लागि निःशुल्क जमिन, शिक्षा–स्वास्थ्यको पूर्ण सार्वजनिकीकरण, तथा राज्य नेतृत्वको औद्योगिक प्रणाली निर्माण गर्नुपर्नेमा जोड दिए । साथै, भ्रष्टाचार न्युनिकरणका लागि अधिकार सम्पन्न सम्पत्ति छानबिन आयोग गठनका माग पनि राखे ।
पार्टीका सचिवालय सदस्य उदयबहादुर चलाउने ‘दीपक’ले सुशीला कार्की नेतृत्वको सरकारले जेनजी बिद्रोहको मर्मविपरीत कदम चालेर राजनीतिक अवस्था जटिल बनाएको बताए । उनले फागुन २१ का लागि तोकिएको चुनाव वर्तमान परिस्थितिमा सम्भव नहुने दाबी गर्दै यथास्थितिमै चुनाव गरिए कडा प्रतिवाद गरिने चेतावनी दिए ।
शान्ति सम्झौता भएको दिन मंसिर ५ कै अवसर पारेर विरोध कार्यक्रम राखिएको बताउँदै चलाउनेले यही मितिबाट जनसंघर्ष अभियान विधिवत् रूपमा सुरू भएकाे घोषणा गरे । अभियानअन्तर्गत २०८२ मंसिरभर प्रदेशस्तरीय अन्तरक्रिया, पुसभर वडा–पालिका तहमा जनजागरण कार्यक्रम र माघ १० गते सबै प्रदेश राजधानीमा विशाल जनसभा आयोजना गरिने जानकारी उनले दिए ।
