काठमाडौँ । बाबुराम भट्टराई नेतृत्वको नेपाल समाजवादी पार्टी (नयाँ शक्ति), जनार्दन शर्मा नेतृत्वको प्रगतिशील राष्ट्रिय अभियान र सन्तोष परियार नेतृत्वको समूह आज एकीकृत हुँदै संयुक्त राजनीतिक शक्ति निर्माण गर्ने भएका छन् ।
नेसपा (नयाँ शक्ति)का प्रचार विभाग प्रमुख रेखी गुरुङका अनुसार राष्ट्रिय सभागृह काठमाडौंमा हुने ‘एकता घोषणासभा’का सबै तयारी पूरा भइसकेका छन् । तीन प्रमुख घटकहरूसहित अन्य वैचारिक तथा संगठनात्मक समूहहरूलाई पनि यस पटकको एकतामा समेटिने बताइएको छ ।
कात्तिक २८ गते नयाँ शक्ति, प्रगतिशील राष्ट्रिय अभियान र परियार समूहबीच एकता सहमतिपत्रमा हस्ताक्षर भइसकेको थियो । आजको कार्यक्रम अन्य राजनीतिक शक्तिहरूबीच व्यापक संयोजनको प्रयासस्वरूप गरिएको हो ।
नयाँ शक्तिले विवेकशील–साझा, नागरिक उन्मुक्ति पार्टी नेपाल, जेनजीका विभिन्न समूह तथा अन्य राजनीतिक धारासँग समेत थप एकताको सम्भावनामा संवाद गरिरहेको जनाएको छ ।
