दाङ । नेकपा (बहुमत) ५ नं. ब्युरोद्वारा आयोजित “बदलिँदो राजनीतिक परिस्थिति, जनसंविधान निर्माण र स्वाधीन संयुक्त सरकार” विषयक अन्तरक्रिया कार्यक्रम मंगलबार दाङ जिल्लाकाे घोराहीमा सम्पन्न भयो । कार्यक्रममा पार्टी महासचिव धर्मेन्द्र बास्तोला ‘कञ्चन’ मुख्य वक्ताका रूपमा उपस्थित भएका थिए ।
मुख्य सम्बोधनका क्रममा महासचिव कञ्चनले देश पछिल्ला वर्षयता गहिरो राजनीतिक अस्थिरता, आर्थिक दवाब र दिशाविहीन नेतृत्वको चपेटामा परेको टिप्पणी गरे । उनले दलाल–पूँजीवादी संरचनाको प्रभुत्वले राष्ट्रलाई निरन्तर संकटतर्फ धकेलिरहेको र जनआन्दोलनका मूल मुद्दा उपेक्षित बन्दै गएपछि जनतामा निराशा र असन्तुष्टि बढेको उल्लेख गरे ।
भ्रष्टाचार, बढ्दो असमानता र प्रशासनिक कमजोरीले शासनप्रति जनविश्वास कमजोर हुँदै गएको जनाउँदै उनले वैकल्पिक राजनीतिक मार्गप्रति आकर्षण तीव्र भएको बताए । यही असन्तुष्टि र अविश्वासले जेन–जी विद्रोहजस्ता घटनाहरू जन्माएको उनको विश्लेषण थियो ।
पूर्वराजतन्त्रदेखि वर्तमान दलगत संरचना समेत देश सुशासनमा असफल भएको जिकिर गर्दै कञ्चनले जनताको प्रत्यक्ष सहभागितामाथि आधारित ‘जनसंविधान’ अबको अनिवार्य राजनीतिक मार्ग भएको धारणा राखे ।
कार्यक्रममा जनमोर्चाका जिल्ला अध्यक्ष गणेश आचार्य, नेपाली कम्युनिस्ट पार्टीका संयोजक बरुण, क्रान्तिकारी कम्युनिस्ट पार्टी नेपालका पोलिटब्युरो सदस्य समीर, नेपाल पत्रकार महासंघका केन्द्रीय सचिव सबिन प्रियासन तथा जनमुक्ति सेना बुद्धिजीवी–प्रतिरोध अभियानका प्रमोद धिताललगायतका सहभागीहरूले पनि आफ्नो अभिमत प्रस्तुत गरे ।
अन्तरक्रियाको अध्यक्षता ५ नं. ब्युरो इन्चार्ज जितले गरेका थिए भने सहजीकरण ब्युरो कार्यालय सचिव सजकले गरेका थिए ।
