विराटनगर । नेकपा (एमाले) को ११औँ राष्ट्रिय महाधिवेशन प्रतिनिधि चयनका लागि मोरङ क्षेत्र नम्बर ६ मा भएको निर्वाचनमा विनोद ढकाल नेतृत्वको प्यानलले पूर्ण बहुमतसहित विजयी भएको छ । ढकाल स्वयं क्षेत्रीय प्रतिनिधि उम्मेदवारको रूपमा सबैभन्दा धेरै— १,५२७ मत— ल्याउँदै शीर्षस्थानमा रहे ।
ढकाल वरिष्ठ उपाध्यक्ष ईश्वर पोखरेल समूहमा रहेका छन् । १० औँ मोरङ जिल्ला अधिवेशनमा पनि ढकाल समूहले नै विजय हासिल गरेको थियो ।
सार्वजनिक नतिजाअनुसार खुला, महिला र युवा तीनै क्लस्टरमा ढकाल पक्षका उम्मेदवार विजयी भएका छन् । खुला तर्फ ढकालसहित पितकुमार श्रेष्ठ (१,२८९), रमेशकुमार पोखरेल (१,२८६) र सत्यनारायण चौधरी (१,२७६) ले जित हासिल गरेका छन् ।
युवा क्लस्टरमा ढकाल समूहका सन्तोष घिमिरे निर्वाचित भए ।
मोरङमा प्रतिनिधिसभाका ६ र एक दलित गरी ७ वटा निर्वाचन क्षेत्र छन् । यस्तै, क्षेत्र नम्बर ४ को परिणाममा ६ मध्ये ५ जना संस्थापन समूह विजयी बनेका छन्, जबकि एक जना मात्र पोखरेल समूहबाट निर्वाचित भए ।
क्षेत्र नम्बर ४ बाट नरेन्द्र बस्नेत, मुकेश बुढाथोकी, महेशप्रसाद भट्टराई, विमला घिमिरे, गुणावती देवी थारु र राम पोखरेल प्रतिनिधि बनेका छन् । भट्टराई इतर पक्षका हुन् भने बाँकी संस्थापनतर्फ परेका छन् ।
जिल्लाभर कुल ४६ मध्ये ३८ प्रतिनिधिका लागि मतदान गरिएको थियो । जसमा ८ जना निर्विरोध निर्वाचित भएका थिए ।
