काठमाडौं, २३ असोज – नेकपा (एमाले) का अध्यक्ष केपी शर्मा ओलीले प्रतिनिधि सभा विघटनलाई असंवैधानिक र अलोकतान्त्रिक भन्दै संसद पुनर्स्थापनाको माग गर्दै ठूलो जनआन्दोलन गर्ने घोषणा गरेका छन् । भक्तपुरको गुण्डुमा आयोजित एक समारोहमा ओलीले उक्त निर्णयलाई संविधानको उल्लंघन भएको र देशको हित विपरीत भएको बताउँदै, अब संसद पुनर्स्थापनाका लागि तत्काल कदम चाल्नुपर्ने कुरा गरेका हुन् ।
अध्यक्ष ओलीले भने, “संसद् विघटन असंवैधानिक, गैरकानूनी र अलोकतान्त्रिक कदम हो, जुन देशको भलाईसँग मेल खाँदैन। कतिपयले फागुन २१ पछि मात्रै संसद पुनर्स्थापनाका लागि आन्दोलन गर्ने सुझाव दिन सक्छन्, तर हामी त्यो पर्खन सक्दैनौं । अहिले नै यसका लागि कदम चाल्नुपर्ने समय आएको छ ।”
उनले थपे, “नेपाली जनता अहिलेका निर्णयको विरुद्धमा सडकमा उत्रेर आन्दोलनको लहर सिर्जना गर्नेछन्। हामी लोकतन्त्र र संविधानको रक्षा गर्दै अघि बढ्नेछौं ।”
ओलीले संसद विघटनको कारण तत्कालीन प्रधानमन्त्री शीला कार्कीको अडानसँग जोड्दै असंवैधानिक कदम लिइएको आरोप लगाए। उनका अनुसार, राजनीतिक सहमतिमा आधारित संसद् र संविधानको रक्षा गर्ने सहमति भएका भए पनि त्यसका बावजूद संसद् विघटन गर्नू कुनै पनि दृष्टिले स्वीकार्य कदम थिएन ।
उनले भने, “संविधानलाई मिच्ने अधिकार कसैले पाएको छैन। हामी सबैको सहमतिमा संविधान र संसद् कायम राख्ने कुरा भएको थियो, तर संसद् विघटन गरेर गलत कदम चालियो। अब समय ढिलो गर्न सकिँदैन। हामी जनशक्ति र आन्दोलनका साथ अघि बढ्नेछौं ।”
अध्यक्ष ओलीले संसद पुनर्स्थापनामा कांग्रेस लगायत अन्य दलहरूको पनि समर्थन रहने विश्वास व्यक्त गरेका छन्। उनले यस आन्दोलनको नेतृत्व एमाले गर्ने भन्दै, “अब हामी सबै मिलेर लोकतन्त्र र संविधानको रक्षा गर्ने अभियानमा उत्रिनेछौं ।”
ओलीका अनुसार, संविधान र संसदको रक्षा गर्दै निकास खोज्ने प्रक्रियामा सबै राजनीतिक दलको एकजुटता आवश्यक छ र यस आन्दोलनको बलियो समर्थन मिल्नेछ भन्ने उनले विश्वास व्यक्त गरेका छन् ।
