काठमाडौं । हुलास स्टिल इन्डिस्ट्रिज प्रालिले नेपाल विद्युत् प्राधिकरणलाई बिजुलीको बक्यौताबापत पहिलो किस्ताको रकम तिरेको छ ।
प्राधिकरणका अनुसार सिमरा वितरण केन्द्र अन्तर्गतको ग्राहक रहेका हुलास स्टिलले ५० लाख ४३ हजार रुपैयाँ बुझाएको हो । कम्पनीले २०७२ साल माघदेखि २०७५ साल वैशाखसम्म प्रयोग गरेको विद्युत् बिल तिर्ने बाँकी रकम १४ करोड १२ लाख ५ हजार रुपैयाँ रहेको थियो ।
उक्त बक्यौता रकम किस्ताबन्दीमा तिर्न हुलास स्टिलले २८ किस्ताको सुविधा लिएको छ । सो व्यवस्थाअनुसार पहिलो किस्ता बुझाइएको प्राधिकरणले जनाएको छ ।
‘हुलास स्टिलले बक्यौता रकम तिरेको यो पहिलोपटक हो,’ प्राधिकरणका एक स्रोतले भने ।
प्राधिकरणले लामो समयदेखि बक्यौता असुलीका लागि प्रयास गर्दै आएको थियो । हुलास स्टिलको पहिलो किस्ता बुझाइसँगै अब बाँकी रकम पनि तोकिएको अवधिभित्र तिरिने अपेक्षा गरिएको छ ।
