काठमाडौं । भारतको बिहार राज्यमा सम्पन्न विधानसभा चुनावमा सत्तारुढ गठबन्धन नेशनल डेमोक्रेटिक अलायन्स (एनडीए) ले ऐतिहासिक सफलता हात पारेको छ । २४३ सदस्यीय विधानसभामा एनडीएले करिब २०२ सिट जितेर दुई तिहाइ बहुमत सुरक्षित गरेको छ । यससँगै जनता दल–युनाइटेड (जेडीयू) का अध्यक्ष नितीश कुमार पुनः मुख्यमन्त्री बन्ने लगभग निश्चित भएको छ ।
गठबन्धनका मुख्य दल भारतीय जनता पार्टी (बीजेपी) ले ८९ सिट र जेडीयूले ८५ सिटमा विजय हासिल गर्दै प्रदेशभरि बलियो जनसमर्थन कायम गरेको देखिन्छ । एनडीएले मगधदेखि मिथिलाञ्चलसम्मका विभिन्न क्षेत्रहरूमा प्रचण्ड मत प्राप्त गरेको छ ।
विपक्षी महागठबन्धन—राष्ट्रिय जनता दल (आरजेडी), कांग्रेस लगायत—ले अपेक्षा अनुसार प्रदर्शन गर्न सकेनन् । उनीहरूले कुल ३५ सिटमा मात्र सफलता पाएका छन् । राजनीतिक विश्लेषकहरूको मत अनुसार मतदाताले यसपटक विकास, स्थिरता र कडा नेतृत्वमा भरोसा देखाएका हुन् । बेरोजगारी, मूल्यवृद्धि र सामाजिक मुद्दा उठाउने विपक्षी दल चुनावी प्रतिस्पर्धामा निर्णायक रुपमा पछि परेका छन् ।
प्रधानमन्त्री नरेन्द्र मोदीले चुनाव परिणामलाई “विकास र सुशासनप्रतिको जनमत” भन्दै स्वागत गरेका छन् । त्यसैगरी गृहमन्त्री अमित शाहले एनडीएमा जनताको देखाएको विश्वास ऐतिहासिक रहेको प्रतिक्रिया दिएका छन् ।
विश्लेषकहरूको अनुसार, नितीश कुमारको संयमित राजनीतिक शैली, संघीय नेतृत्वसँगको तालमेल र गठबन्धनभित्रको सूक्ष्म सन्तुलनले उनलाई पुनः सत्तामा फर्काएको हो । आगामी कार्यकालमा रोजगार सिर्जना, कानुन–व्यवस्था, पूर्वाधार विकास, शिक्षा–स्वास्थ्य सुधार र प्रदेशगत असमानता कम गर्नु उनको मुख्य चुनौती रहनेछ ।
(स्रोत: भारतीय समाचार एजेन्सी तथा स्थानीय निर्वाचन आयोग)
